متشردة

موضوع: متشردة الإثنين أبريل 28, 2008 1:51 am

مُتَشــــــرِدَه

فايت بلادي خلاص وماشي

عشان حياتي اتلخبطت

مبقاش في حاجه تستحق

مَــهو كل حاجه اتحطمت

بدأت حكايتي فـ قلب حارتي ع الرصيف

ونا كنت رايح جامْعتي

وفـْ سكتي

لقيتها قاعدة بترتعش

من برد يمكن او لـْ خوف

قامت مشاعري تنتفض

وِقفِت صفوف

تسند شروخ القلب

وتسد فـ شقوق الحروف

وألـمـلم الحبر اللي فاضل في القلم

واركِنه

واخط خط جوا اوراق الألم

واسكِّـنه

جوا العدم

لـَجل ما يكون مختفي

وانسى اللي فات

عشان اجمع همتي

واكتب واقول

عن الحكاوي اللي اتحكت

عن ليل طويل

وبرد قارص ينفلت

بين الضلوع

واللقمه نشفت ع الرصيف

مش سَده جوع

ومفيش غطا

مَــــ هي ليها حق ترتعش

والناس تعدي جنبها

خايفه تشوفها تندوش

ولا حد بان من اهلها

وشَـعرها

واقف يسبح ربها

والبسمة تيجي وللأسف

لما يزورها اي عابر للطريق

يحسن اليها

وتبان سنانها مكسرة

وعلى وشها

بايت تراب الليل

معفر فَرشها

مفروش عليها

مــَ هي اصلها ساكنة الرصيف

والناس تعدي بالـ آلاف

والكل مهموم بالهموم

والكل ماشي ضيف خفيف

وتبات ليوم .. والثاني والثالث

تقوم

عاوزة تغير لبسها

ازاي وفين ؟

مهو اصلها حوليها مليون الف عين

مفتحين

والستر فاتها من سنين

ونقول هيجي الليل ويستر عالرقع

لكن صحيح

هتجيب منين

تلبس جديد

مهو اصل صرتها الحزينة مهلهلة

مفهاش جديد

فيها بُقع

مربوطه فيها بسلسلة

لـَ تنسرق

والنوم غرق

في بحر عينها الدبلانين

الحزنانين

وتلاقي لقمة مفرتكه

كلب السكك

جابها وسابها جنبها

اصل الكلاب بتودها

واحنا البشر نورنا ضرير

ونا قلبي يتقطع وشايف شكلها

قلمي بيصرخ مـ النزيف

حبره خلص

ولساني عاوز يتخرس

لكن ضعيف

سارقــُه الكلام والحروف

والناس ترده بالكفوف

وبيحدفوا على قلبي خوف

عاوزيني ابقى زيها

واعيش معاها عالرصيف

واجوع واشحت جنبها

علشان كدا

علشان حياة متشرده

قررت امشي .. خلاص مشيت

وهقول لبكرة انتهيت

هقول يا بكرة انتهيت

**********

lol!